Daar word van tyd tot tyd Spoorsnykursusse aangebied. Hierdie kursusse word slegs gehou wanneer daar 'n behoefte bestaan by lede vir so 'n kursus, en nie op gereelde grondslag nie. Skakel die Hoof Opleidingsbeampte van Uitvoerend, (Tinus Erasmus 082 739 0414) indien jy belangstel.

 

2013 het so kursus gesien, te danke aan Carel Buitendag en Kobus Schoeman van die Jag Akademie.

In samewerking met Kobus Schoeman het die Bosveld Jagters en Wildbewarings Vereniging (BJV) `n spoorsny kursus aangebied op die plaas Etosha naby Warmbad van Vrydag 11 Januarie tot 13 Januarie 2013. Tinus en Tertuis Erasmus, Dawie Van Vuuren, Andre en JD Le Grange, Johan Van Loggenberg, Gerrit Boersma en Hansie Botha was die manne wat agter die banke ingeskuif het.

 

 

Die kursus wat aangebied word deur Kobus Schoeman bestaan uit beide prakties en teorie en word so aangebied om die maksimum te leer en te ervaar wat in die veld gebeur ten opsigte van spore en tekens wat die jagter in die veld kan tee kom. Sy jare lange ervaring spreek boekdele en die kennis wat oorgedra word is van onskatbare waarde. Dis net hier waar ons leer dat die spoor op die grond die spreekwoordelike punt van die ysberg is en maar net die begin en eerste teken is wat die boek van spoorsny oopmaak.

 

Die kursus word onder die volgende punte aangebied

1.       oorsprong van spore

2.     die wet en spore

3.     ekologie en spore

4.     die moeilikheids graad van spoorsny

5.     eienskappe van `n goeie spoorsnyer

6.     spoor identifikasie en onderskeid

 

 

Theo Alers, die plaasbestuurder van Etosha, het ons vergesel in die veld en ons tuis laat voel in die kamp, asook sy vrou Marisa en Thabo Lombard wat reg gestaan het in die kombuis. Die plaas is ongeveer 1000ha groot en het Buffels, Koedoes, Njala, Bosbok, Rooihartebees, Blouwildebees, Blesbok, Waterbok, Zebra, Duiker, Steenbok, Vlakvark, Bosvark en nog `n verskeidenheid klein spesies soogdiere, reptiele en voels.

 

Aan die einde van die kursus het elke kursusganger n 50 punt toets oor die kursus geskryf waarna sertifikate uitgedeel is aan almal.

 

Kobus se ongelooflike ervaring ten opsigte van die natuur, jag, wapens, mense en al die wette en ordonansies maak die kursus baie meer as net ‘n spoorsnykursus, dit kan eerder as lewensverrykende ervaring beskryf word. Die ervaring kan ten sterkste aanbeveel word vir enige persoon wat n passie het vir jag en die natuur.